Imminut akilersinnaasumik ineriartortitsineq
Kalaallit Nunaata kusanarnersuani minguinninilu ilisimaneqaatigai. Aammali Kalaallit Nunaanni pinngortitaq navianartorsiortinneqarpoq. Ilaatigut silarsuup sinnerani suliffissuaqarfiusumit avatangiisitigut sunnersimaneqarpugut ilaatigullu inuiaqatigiit Kalaallit ineriartornerata kingunerisaanik pinngortitaq sunnersimaneqarluni - suliffissuit, aatsitassarsiorfiit, uumasuuteqarfiit, aalisarneq assartuinerlu - aamma avatangiisinik pinngortitamillu artorsartitsisinnaapput, suut ajutoorfioratarsinnaasut kommunimut pilersaarusiornermi piareersimaffigineqanngippata.
Pinngortitaq minguitsoq kujataamiunut tikeraanullu naleqaqimmat kommunip pilersaarusiornermini piujuaannartitsineq tunngavigalugu ineriartortitsisoqarnissaa qularnaassavaa.
Anguniakkat:
- Kujataani pinngortitap pisuussutai, nunamiittut immamiittullu, kujataamiut inuussutissarsiornikkut sukisaarsaarnikkullu isumalluutissaattut allanngutsaaliorneqassasut
- inuussutissarsiornikkut avatangiisit artorsartinneqarnerat killilersimaneqassasoq, aamma suliat, soorlu aatsitassarsiornerup, unereernerisigut pinngortitap iluarsaqqinneqartarneratigut.
- pinngortitaq takornariartitsivigineqarsinnaassasoq aserorsarneqarani.
- illuaqqanik allanillu asimi sanasoqartillugu nuna pissusia pinngortitallu naleqarnera ataqqineqartassasut.
- orpippassualerineq pinngortitamillu illersuineq ineriartortinneqassasut
- Kommune Kujallermi ineriartorneq CO2-p aniatinneqarneranik millisaaqataassasoq
Killiffik iliuutsillu
Kommune Kujalleq ineriartornerup piujuaannartitsinermik tunngaveqartinneqarnissaanut aallaavissaqarluarpoq. Kommunimi inoqutigiit amerlanersaat, sullissiveqarfiit aammalu suliffeqarfiit namminersortut imermik innaallagissiorfimmit CO2-mik aniatitsiviunngitsumit sarfalersugaapput. Illoqarfiit annersaanni Qaqortumi inissiarsuit ilarpassui ikuallaavimmiit kiassarneqarput, kiisalu kiassaateqarlutik innaallagiatortunik imermik sarfaliorfimmiit sarfalersugaasunik.
Illoqarfiit nunaqarfiillu minnerumaat piujuaannartitsineq tunngavigalugu ineriartortitsivigissallugit aallaavissaqqissuupput. Biilinik angallanerulernersitsinngikkaluarluni sumiiffinni mikisuni illoqarfimmik ineriartortitsisoqarsinnaavoq. Inuussutissat annertuumik najugarisami tunisassiarineqarsinnaapput, taamalu assartuinikkut avatangiisit ilungersortittariaqaratik, kiisalu inuit pinngortitamut qanissusertik pissutigalugu illersuinissaminnut akisussaaffeqalersarlutik. Inuiaqatigiinnguani - nunaqarfinni savaateqarfinnilu - aamma piujuaannartitsiviusumik immikkuullarissunik tunisassiornikkut aaqqiissutissiornissamut misileraaviusarput, imermik nukissiorfeeqqanik atuinikkut kiisalu piujuaannartitsineq tunngavigalugu inuussutissanik tunisassiornikkut.
Takornariaqarneq Kujataanilu najugaqartut pinngortitamik atuinerat piujuaannartitsinermik tunngaveqarnissaat anguniarneqassaaq. Ilaatigut tamanna pissaaq pinngortitami sumiiffiit assigiinngitsut pissusii, suut allanngujasuuneri suullu mianerisariaqarneri pillugit paasissutissiornikkut, ilinniartitsinikkut angalaarussisarnikkullu. Pisummik angalaarfiit nalunaaqqutsersorneqarsimapput oqqiffissalersorneqarsimallutillu, taamalu pisummik takornariartitsisarneq pitsaasunik atugassaqartitsiviulluni. Savaateqarfiit unnuisitsisarlutik nerisaqartitsillutillu takornariartitsisarnerat aamma piujuaannartitsilluni takornariartitsinertut isigisariaqarpoq.
Sutigut sapinngisamik amerlasuutigut inuiaqatigiit CO2-mik aniatitsiviunngitsoriartuinnarlutik ineriartortuinnarnissaat kommunimut pilersaarummi anguniagaavoq.
Dyrnæs, Narsaq
Upernaviarsuk