Kalaallit Nunaanni pinngortitap kusanassusersuani minguitsuuninilu ilisimaneqaatigai. Pinngortitarli aamma aarlerinartorsiortinneqarpoq. Ilaatigut silarsuup sinnerani suliffissuaqarfinnit avatangiisitigut sunnersimaneqarpugut ilaatigullu inuiaqatigiit kalaallit ineriartornerat - tunisassiorfiit, aatsitassarsiorfiit, uumasuuteqarneq, aalisarneq angallassinerlu - avatangiisinik pinngortitamillu artorsartitsisinnaapput kommunimut pilersaarusiornermi piareersimaffigineqanngikkunik.
Pinngortitaq minguitsoq nunap inuinut tikeraanullu pingaaruteqaqaaq, taamaammat aserorsaataanngitsumik ineriartortitsisoqarnissaa kommunip pilersaarusiornermini qularnaartariaqarpaa.
Anguniakkat:
Kommune Kujalliup kissaatigaa
- Kujataani pinngortitap pisussutai, nunamiittut immamiittullu, inuisa inuussutissarsiornerminni sunngiffimminnilu iluaqutissaattut allanngutsaaliorneqassasut,
- inuussutissarsiornikkut avatangiisit innarlerneqartarnerat killilersimaarneqassasoq, assersuutigalugu aatsitassarsiornerup kingornagut pinngortitap iluarsaqqittarneratigut,
- pinngortitaq innarlerneqarpallaarani takornariarfigineqarsinnaassasoq
- asimi illuaqqanik assigisaannillu sanasoqartillugu nunami pinngortitamilu pingaarutillit ataqqineqartassasut,
- nunalerineq, orpippassualerineq pinngortitamillu illersuineq ineriartortinneqassasut,
- Kommune Kujallermi ineriartorneq CO2-mik aniatitsinermut apparsaaqataassasoq.
Sumiiffinnut agguataarineq aalajangersakkallu
Namminersorlutik Oqartussat april 2011-imi kommunit asimi nunaminertat pillugit pilersaarusiortarnerat aqutsinerallu pillugu maleruaqqusaliorput.
Nuna tamakkerlugu pilersaarusiortarnermut maleruaqqusaq Kalaallit Nunaanni tamarmi asimi sumiiffinnik toqqartuiffiuvoq nunaminertallu atorneqarnissaannut aalajangersaaviulluni, taamaammallu aamma Kommune Kujallermut atuuttunik imaqarluni. Kommunimut pilersaarut sumiiffinnut ataasiakkaanut aalajangersakkat erseqqissarnerinik imaqarpoq sumiiffiillu ataasiakkaat nutaajusut pillugit ataasiakkaanik aalajangersagaqarluni.
Nuna tamakkerlugu pilersaarusiortarnermut maleruaqqusakkut kommunimullu pilersaarutikkut matumuuna asimi nuna tallimanut assigiinngitsunut agguataarneqarpoq: Sumiiffiit K illuaqqanut aasarsiortarfinnullu, Sumiiffiit L sukisaarsaarfissiat, Sumiiffiit M nunalerinermut (savaateqarnermut allanullu), Sumiiffiit N teknikkikkut atortorissaaruteqarfinnut kiisalu Sumiiffiit O attorneqartussaanngitsut
