Sumiiffiit nunalerinermut, savaateqarnermut atugassat. (Sumiiffiit M)
Sumiiffiit nunalerinermut, savaateqarnermut, immamik atuinermut, orpilerinermut allanullu atugassanngortitat ilisarnaatigisarpaat sulianut taaneqartunut taakkulu illutaannut atasunik illutaqartaramik, atortorissaaruteqarfiusaramik allatullu nunaminertamik annertuumik atuiffiusaramik. Allatut oqaatigalugu, pisuussutinik uumassusilinnik atuinermik tunngaveqarluni inuussutissarsiornermut atugassanik sanaartorfiusinnaapput, atortorissaarusiorfiusinnaapput allatullu nunaminertamik annertuumik atuiffiusinnaallutik.
Sumiiffiit nunalerinermut, savaateqarnermut immamik atuinermut, orpilerinermut allanullu atugassiat amerlasuutigut ilisarnaatigisarpaat ataasiakkaanik angisuunik illutaqartaramik pilersuinermut teknikkimullu atortorissaarutitaqartunik. Taakku tassaasinnaapput angallannermut periarfissat pitsaasut. Taamaammat sumiiffiit ilaanni tamakkunani sanaartukkanut atortorissaaruteqarfinnullu atasunik pilersuinermik pilersitsisoqarsinnaavoq.
Killimmik amerlassusilinnik illuaraqarsinnaavoq, aasarsiortarfeqarluni piniariartarfeqarlunilu aammalu oqqittarfeqarluni, tassa taakku amerlassusertik pissutigalugu nunap ilaata tamatuma atorneqarnissaattut aalajangikkamik allannguissanngippata.
Sanaartukkat
Sumiiffinni nunalerinermut, savaateqarnermut, immamik atuinermut, orpilerinermut allanullu immikkoortitani sanaartukkanut piumasaqaatituaasoq tassaavoq illuaraq nutaaq sananeqartoq illuliamut inuussutissarsiornermi atugassamut minnerpaamik 60 meterinik ungasissuseqassammat. Aammattaaq illuaqqat akunnerminni minnerpaamik 60 meterinik imminnut ungasissuseqassapput.
Angallannermut pilersuinermullu atortut
Sumiiffiit ilaanni taakkunani atortorissaaruteqarfinnut sanaartukkanullu atasunik talittarfiliortoqarsinnaavoq, aqquserniortoqarsinnaalluni, biilinut ingerlaviliortoqarsinnaalluni imaluunniit pisuinnarnut aqquserniortoqarsinnaalluni. Aamma pilersuinermut teknikkikkut atortulersuisoqarsinnaavoq, soorlu innaallagissiornermut, imeqarnermut, nalunaarasuarnermut kuuffeqarnermullu atortulersuisoqarsinnaalluni sumiiffiit ataasiakkaat namminneq pilersorneqarnerinut atugassanik. Imermik katersuiffiliorneq kuuffiilluunniit aniaffiliorneq aatsaat Naalakkersuisut akuersiseqqaarlugit pisinnaavoq.
