Retningslinier for arealtildelinger
Kalaallit Nunaanni kommunit killeqaarfiisa iluini nunaminertat kommuninit aqunneqarput. Illoqarfiit, nunaqarfiit nunaminertallu asimiittut Pilersaarusiorneq aamma nunaminertat atorneqartarnerat pillugit Inatsisartut inatsisissaat nr.17, 17. November 2010-meersoq tunngavigalugu killeqarfiit pillugit malittarisassat imaattut akuerissutigineqarput.
§ 1 Qaqugu nunaminertamik qinnuteqartoqarsinnaava
Imm. 1 Nunaminertat siusinnerusukkut atugassanngortinneqarsimanngitsut tamanik atorneqartussaanngitsutut siunertamut allamut atorneqarnissaa kissaatigineqaraangat nunaminertamik qinnuteqaat tunniunneqartassaaq. Tassa imaappoq illuutigisap atareersup alliffissaatut, nutaanik naatsiiviliorfissatut, quiliorfissatut, kabelinik inissiivissatut, ledninginik inissiivissatut, ruujorinut il.il. inissiivissatut.
Imm. 2. Nunamineramik qinnuteqaat tunniunneqartassaaq nunaminertap siusinnerusukkut atugassanngortinneqarsimasup atorneqarnerani siunertamik allanngortitsisoqarpat.
Imm. 3. Nunaminertamik qinnuteqaat atugassanngortinneqassaaq nunaminertamut siusinnerusukkut atugassanngortinneqarsimasumut pisinnaatitaaffiit allamut tunniunneqartussanngoraangata.
§2 Qanoq illulliuni nunaminertamik qinnuteqartoqarsinnaava
Imm. 1. www.kujalleq.gl nittartakkap iluani NunaGIS-imut iseriarluni nunaminertamik qinnuteqaammik immersugassamik aallertoqarsinnaavoq.
Imm. 2. Kommune Kujallermi illoqarfinni pingasuusuni teknikkeqarnermut ingerlatsivinnut taamatuttaaq nunaqarfinni allaffinnut saaffiginninnikkut nunaminertassamik qinnuteqartoqarsinnaavoq.
Imm. 3. Nunaminertamik qinnuteqaat suliarineqassappat kommunalbestyrelsi qinnuteqartumut paasissutissanik amerlanerusunik piumasaqarsinnaavoq, makku ilanngullugit:
3.1 Suliap teknikkikkut aningaasaqarnikkullu naammassineqarsinnaaneranut uppernarsaatissat.
3.2 Atorneqarsinnaasunut siunnersuusiorsimanissaq.
3.3 Suliariniakkap takussutissartai
3.4 Qinnutigisamut akiliuteqarnissaq piumasaqaataasimappat sanaartorfigissaanermut akileeqataassutinut qularnaveeqqusiinissaq.
Imm. 4 Kommunalbestyrelsip qinnuteqaat itigartissinnaavaa paasissutissat imm. 3-mi taaneqartut piffissaliunneqarsimasup sapaatit akunnerinik sisamanik sivisussuseqartup iluani tunniunneqarsimanngippata.
§ 3 Tamanut saqqummiussineq
Imm. 1. Tamanut saqqummiussineq pisarpoq kommunalbestyrelsep isumaa malillugu suliamut attuumassuteqartut tusarniaavigineqarnerisigut, kommunip nittartagaa www.kujalleq.gl – kiisalu illoqarfiiup allagarsiivii aqqutigalugit.
Imm. 2. Illoqarfimmi nunaqarfimmiluunniit nunaminertamik qinnuteqaammut atatillugu ullut 14 qaangiutsinnagit asimullu tunngasortaanut qinnuteqaammut sapaatip akunneri pingasut qaangiutsinnagit naammagittaalliuut tunniuneqareersimassaaq. Allatigut naammagittaalliortoqassagaluarpat kommunalbestyrelsemut ingerlateqqinneqassaaq.
Imm. 3. Kommunip nittartagaatigut www.kujalleq.gl –ikkut nunaminertanik atugassanngortitsisoqaraangat pisortatigoortumik nalunaarutigneqartarpoq.
Imm. 4. Nunaminertat atugassannortinneqareersut pillugit nalunaarutiginerisa kingorna kingusinnerpaamik qaammatit marluk qaangiutsinnagit naammagittaalliuutit nassiunneqareersimassapput. Allatigut naammagittaalliortoqassagaluarpat kommunalbestyrelsemut ingerlateqqinneqariarluni Namminersorlutik Oqartussanut ingerlateqqinneqassaaq.
§ 4 Nunaminertat atorneqanngitsut nalunaarutigineqarnerat atugassanngortinneqarnerilu
Imm. 1. Kommunalbestyrelsip ingerlaavartumik nunaminertat qinnuteqaatigineqarsimasut sumiinneri nalunaarutigisarpai.
Soqutiginnittut nunaminertamik qinnuteqarsinnaapput. Qinnuteqarnissamuttaaq piffissaliussassaq killeqarpoq.
Imm. 2. Qinnuteqarnissamut piffissaliussap qaangiunnerata nalaani qinnuteqartut ilaqqippata qinnuteqaatit ilanngutiinnartussatut naatsorsuutigineqassapput.
Imm. 3. Nalunaaruteqarnermut atatillugu nunaminertamik ataatsimik piukkunnartunik arlalinnik qinnuteqartoqarpat, sorliup nunaminermik pineqartumik atugassinneqarnissaa makitsinikkut aalajangerneqartarpoq. Makitsineq tunngavigalugu nunaminertamik qinnuteqartut piukkunnartut utaqqisussatut tulleriinnilerneqartarput.
Imm. 4. Nunaminertamik atugassanngortitsineq atorunnaassagaluarpat, qinnuteqartut utaqqisut tulleriiaarneranni siullinngortoq nunaminertamik neqeroorfigineqassaaq.
Imm. 5. Qinnuteqarnissamut piffissaliussap qaangiunnerata, tassa sapaatip akunnerani suliffiusup naanerani nalaani, qinnuteqartut ilaqqippata qinnuteqaatit ilanngutiinnagassatut naatsorsuutigineqassapput.
Imm. 6. Nunaminertamik atugassanngortitsineq atorunnaassagaluarpat, nunaminertaq qinnuteqartut utaqqisut tulleriiaarneranni nunaminertaq pineqartoq tullinnguuttumut neqeroorutigineqassaaq.
§ 5 Nunaminertamik tunniussinermi atugassarititaasut tunngavigisallu
Imm. 1. Nunaminermut atuisinnaanermut akuersissut nunaminertamik siunertamut taaneqartumut atuisinnaanermik akuersissutaavoq.
Imm. 2. Nunaminertamik atugassanngortitsineq immikkut taaneqartumik atugassaqarfiuvoq, soorlu makkuninnga:
2.1 Pilersuisnermi aqqutinut assigiingitsunut ataatsimoorussanut, soorlu sarfap aamma erngup aqqutaanut kiisalu eqqakkat imerpalasut kuuffiinut, atassusertussaatitaaneq.
2.2 Aqqusinermut pingaarnernut atasusertussaatitaaneq kiisalu qassinik sumilu biilinut uninngavissanik sanaartorniarnermik nalunaartussaatitaaneq.
2.3 Akuersissutinik allanik pissarsinissaq, soorlu snaartornissamut, assaanissamut, atassusiinissamut allanullu akuersissutinik.
2.4 Nunaminertap atorneqarneranut atatillugu saliinissamut, ileqquatut ilillugu qimatsinissamut qularnaveeqqusiinissat, soorlu aningaaserivimmi qularnaveeqqummik assigisaannilluunniit siumoortumik akiliilluni qularnaveeqqusiinissaq.
2.5 Sanaartorfigissaanermut akiliuteqarneq.
2.6 Kommuni pillugu pilersaarusiami najoqqutassaareersunut akuersissutigineqartunut nunaminertat suli ilanngunneqanngitsut malittarisassanut akerliunnginnissaat siunertaralugu, nunaminertamik nunaminertamilu sumiiffiit ilaannik tunisisarneq pillugu aalajangersagaliortoqassaaq.
2.7 Nunaminertamik tunineqareernerup kingorna kingusinnerpaamik ukioq ataaseq qaangiutsinnagu, qinnuteqarnermi akuersisoqareersimanissaa taamatuttaaq kingusinnerpaamik ukiut marluk qaangiutsinnagit illuliornerup aallartereersimanissaa naatsorsuutigineqarpoq.
2.8 Tunngiuaviusumik piffissaliussat qaangiutsinnagit immikkullu qinnuteqartunik pisariaqartitsisoqartillugu, piffissaliussamik kommunalbestyrelse sivitsuisinnaavoq.
§ 6 Nunaminertanik atugassanngortitsinermi sanaartukkat ungasissusissaat ataqqineqartussat
Inissianik sanaartofissani nutaani pioreersunik snaartugaqarpat malittarisassani atuuttuni piumasaqaatit tunngavigalugit ungasissusiliisoqartassaaq, soorlu makkunani:
- Sarfamut sakkortuumut ledninginut napparutit nuuiniit illumut qaninnermut ungasissusissaq 50 meteriuvoq.
- Aqqusineqarneq. Aqquserngit annerit qeqqaniit 7,5 meteriullunilu aqquserngit mikinerit qeqqaniit 5 meteriuvoq.
§ 7 Nunaminertamut atugassanngortinneqartumut pisinnaatitaaffiit allamut tunniunneqarneri
Imm. 1. Nunaminertanmik atuinissamut, nunagissaareernermi toqqavissanillu qaartiterereernermi il.il. aatsaat kommunalbestyrelsip akuersereerneratigut pisinnaatitaaffimmik allanut tunniussisoqarsinnaavoq.
Imm. 2. Nunaminertap atukkiussassap tunngaviusumik pilersaarusiorneqarneranut pisinnaatitaaffinnik tunniussisarneq pillugu malittarisassanut akerliunngippat kommunalbestyrelsimit akuerineqarsinnaavoq.
Imm.3. Nunaminertamik nutaamik atugassanngortitsinikkuinnaq nunaminertamik atuisinnaanermut pisinnaatitaaffinnik tunniussisoqarsinnaavoq.
§ 8 Nunaminertap atugassanngortinneqarsimagaluartup atorunnaarsinneqarnera
Imm. 1. Nunaminertamik atugassanngortitsinerugaluaq atorunnaartarpoq nunaminertamik atugassanngortitsinermi atugassarititaasut naammassineqarnissaannut piffissaliunneqartoq qaangerneqaraangat.
Imm. 2. Illuliornissamut nunaminertamik atugassanngortitsineq atorunnaartarpoq sanaartulernissaanut akuersissut qaangiussimappat imaluunniit sanaartulernissamut akuersissut atorunnaarsinneqarsimappat.
Imm. 3. Kommunalbestyrelsimit naliliivigineqarpat atugassarititaasunik eqqortitsisoqanngitsoq, piffissalikkamik pissutsinik iluarsiisoqarnissaa piumasarineqarsinnaavoq. Piffissaliunneqartoq eqqortinneqanngippat nunaminertamik atugassanngortitsinerugaluaq atorunnaarsinneqassaaq.
Imm. 4. Nunaminertamik atugassanngortitsinerugaluaq atorunnaarsinneqarsinnaavoq maleruagassani ukunani atugassanngortitsinissamut aalajangersagaqarpat, qinnuteqartoq piaaraluni imaluunniit mianersuaalliorujussuarluni atugassanngortinneqarnissaminut atasumik paasissutissanik pingaarutilinnik eqqunngitsunik nalunaaruteqartarsimappat.
§ 9 Nunaminertap atugassanngortinneqarnera atorunnaarsinneqarpat pissusissaatut ilillugu qimatsineq
Imm. 1. Nunaminertap atugassanngortinneqarnera atorunnaarsinneqarsimappat nunaminertamik atuinissamut akuerineqarsimagaluartoq pisussaavoq nunaminertap pissusiatut ilillugu suliarinissaanut.
Imm. 2. Nunaminertap atugassanngortinneqarnera atorunnaarsinneqarsimasumi inerlugu suliarineqarsimanngitsunik illoqarpat allamilluunniit suli B-normulerneqarsimanngitsunik sanaartugaqarpat nunaminertamut pisinnaatitaaffiit kommunalbestyrelsip akuersissuteqarneratigut allamut tunniunneqarsinnaapput nunaminertap atugassanngortinneqarnerani piumasaqaatit siulliit assinginik piumasqaatitalerlugit. Taakkununnga ilanngullugu piginnittoq nutaaq illuliarneqartup aamma imaluunniit sanaartorneqartunut allat inerlugit suliarineqarnissaanut piumasaqarfigineqassaaq.
§ 10 Sanaartorfigissaanermut aningaasartuutit agguataarneqartrarnissaannut tunngaviit
Imm. 1. Sanaartorfigissaanermut aningaasartuutit katinnerisa illunut nunaminertap siumut aalajangersaavigineqareersimasup iluaniittunut agguarneqarneratigut, nunaminertani inissialiorfissani inuussutissarsiuteqarfissanilu nutaani sanaartorfigissaanermut aningaasartuutit akiligassanngortinneqartassapput. Agguaanermi tunngaviusoq nunaminertallu killilerneqarnera akiliuteqarnissamut immikkut malittarisassiami aalajangersarneqartassapput, tassami sanaartorfissaanermut pilersaarusianut ataasiakkaanut akiliuteqartarnissanut malittarisassiortoqassammat.
Akiliuteqartarnissamut malittarisassani agguataarinermut tunngasut imm. 2-miit imm. 7-imut takuneqarsinnaapput.
Imm. 2. Inissialiorfissani nutaani (A) sanaartorfigissaanermut aningaasartuutit agguataarneqartassapput nunaminertap akiliuteqarnissamut malittarisassaqarfiup iluani inissiat amerlassusii najoqqutaralugit
Imm. 3. Nunaminertani umiarsualiveqarfinni inuussutissarsiuteqarfinnilu nutaani (B) sanaartorfigissaanermut aningaasartuutit agguataarneqartassapput inuussutissarsiuteqarfiit nunataasa qanoq angitigineri tunngavigalugit.
Imm. 4. Illoqarfiup ilaani ataatsimoorussatut siunertaqarfiusuni (C) sanaartorfigissaanermut aningaasartuutit sanaartukkat ataasiakkaat nunaminertap akiliuteqarntarnissamut malittarisassaqarfiup iluani sanaartorneqartut tamarmik katillutik initaasa quleriiaat qanoq initutiginerannut naleqqiullugit agguataarneqartassapput.
Imm. 5. Illoqarfiup ilaani ataatsimoorussanik sanaartorfiusuni nutaani (D-mi E-milu) sanaartorfigissaanermut aningaasartuutit qanoq agguataarneqarnissaat qinikkanit immikkut aalajangiiffigineqartassaaq.
Imm. 6. Tamalaanut atugassanut sanaartorfigissaanermut aningaasartuutinik agguaassinissaq politikkikkut immikkut ittumik aalajangiivigineqartassaaq.
Imm. 7. Nunaminertat ilaanni atorneqareersuni illunik piginnittut
erngup sarfap aamma oqarasuaatit aqqutaannut kiisalu erngup atoreerlugu iginneqartartup aqqutaannut aningaasartuutit naamminneq akilertassavaat.
Imm. 8. Inissiaqarfinni pioreersuni namminerisaminnik illuutillit eqqakkanut imerpalasunut kuuffinnut atassusiinerminni illumiit uuttorlugu 10 meteriniit ungasinnerusunut aningaasartuutimik affaat tikillugit tapiissuteqarfigineqarsinnaapput – illumulli ataatsimut annerpaamik 20.000 koruunit tapiissuteqarfigineqarsinnaallutik. Pilersaarusiaq naammassineqariarpat qinnuteqartoqarsinnaavoq.
§ 11 Sanaartorfigissaanermut aningaasartuutinik akiliisitsiniartarneq
Imm. 1. Sanaartorfigissaanermut akileeqataassutinik akiliisitsiniartarneq nunaminertamik atugassanngortitsinermut atatillugu pisassaaq, akiligassap angissusiata aalajangerneqarneranut akiliuteqarnissamut immikkut malittarisassiaq sanaartorfigissakkamut atuuttoq tunngavigineqassammat. Akiliutissap akileqquneqartup angissusia kingusinnerusukkut iluarsineqartassaaq, tassa sanaartorfigissaanermut pilersaarusiaq naammassineqareeraangat aningaasasrtuutillu angissusiat eqqortoq ilisimaneqalereeraangat.
Imm. 2. Kommunalbestyrelse sanaartorfissani ataasiakkaani sanaartorfigissaanermut aningaasartuutit akilerneqartarnissaannut malittarisassanik aalajangersaasinnaavoq.
§12 Nunaminertanut qinnuteqaatit suliarinerinut akitsuutit
Imm. 1. Nunaminertanik atugassanngortitsinermut atatillugu akitsuuteqartitsisoqartarpoq. Tak. kommunip pisortatigoortumik akigititat pillugit allattorsimaffiiniittut.